“BAKIT naman Engineering?” protesta ni Christopher nang malamang iyon ang kursong gustong kunin ni Maita. “Para classmates pa rin tayo,” masiglang sabi ng dalaga. “Pero mahina ka sa Math.” “Hindi bale, nand’yan ka naman,” aniya. Napakamot sa noo ang lalaki. “Hindi puwedeng gano’n,” mari¬ing sabi nito. “Kailangan ay gusto mo ang kursong kukunin mo.” “Iyon nga ang gusto ko, eh, maging engineer para ikaw pa rin ang buddy-buddy ko,” giit niya. Tinapik niya ang binatilyo sa balikat. “Kilala mo naman ako, Chris, marunong tumupad sa pangako. Nagsumpaan tayo noon na hindi tayo maghihiwalay.” “Natatandaan mo pa rin ‘yon? Aba’y nasa kinder pa tayo no’n, ah. Isa pa’y wala pa akong isip noon. Akala ko noon ay lalaki ka.” “Ulol!” Binatukan niya ito nang mahina. Napaungol ito nang tamaan ang sugat nito.
