Ang huling text message sa boyfriend
January 31, 2016
Nakuha pang makapag-text sa kanyang boyfriend para humingi ng tulong bago nalagutan ng hininga ang isang 19 anyos na dalaga na pinagsasaksak ng hindi pa nakikilalang salarin habang naglalakad pauwi ng kanilang bahay kamakalawa ng gabi sa bayan ng Malilipot, Albay.
Tatlong saksak sa dibdib at tagiliran ang tinamo ng biktimang nakilalang si Mary Joy Bolor, estudyante at residente ng Barangay Canaway ng nabatid na bayan.
Patuloy naman ang ginagawang follow up operation ng mga awtoridad sa posibleng pagkakakilanlan sa suspek na pinaniniwalaang mabilis na tumakas matapos ang krimen.
Sa ulat ng pulisya, naganap ang insidente pasado alas otso ng gabi habang naglalakad ang biktima sa kahabaan ng Barangay Canaway at pauwi na sana sa kanilang bahay.
Posible umanong inabangan ng suspek ang biktima sa madilim na parte ng lugar at alam nito na nag-iisa lang ang dalaga sa pag-uwi.
Napag-alaman pa sa pulisya na nakuha pang makapag-text sa kanyang nobyo ng biktima at nakasaad sa text ang paghingi ng tulong nito dahil sa sinaksak nga raw siya.
Mabilis namang nakaresponde ang boyfriend ng dalaga kasama ang lalaking kaibigan subalit wala na ring buhay ang biktima nang datnan nilang nakahandusay sa kalsada.
EDITOR’S TAKE:
Napakalungkot na wakas ng isang pagmamahalan. Muli, alam nating mahahabol ng batas ang walang pusong pumatay sa dalaga.