Pagdating sa amang si Menandro, tila bato na ang puso ni Yelena. Saksi siya sa paghihirap ng ina dahil sa ginawa ng amang pagtataksil ditto, hanggang nga sa mamatay ang babae sa sakit na cancer. Umuwi man siya sa bayang sinilangan, malayo pa rin sa isip niyang patawarin ang ama. Ang tanging rason kaya siya ay naroon ay upang lalo itong pasakitan. Nais niyang pagdusahin ito sa lahat ng ginawa nito sa kanilang mag-ina. Pero hindi naging madali sa kanya na gawin iyon. Sa tuwina kasi, naroon si Drix na mistulang tagapagtanggol ng ama niya.