Mula Noon Hanggang Ngayon

MALAYO na ang ayos at hitsura ni Edna kumpara sa huling pagkakataon na nakita ni Alex ang dating nobya. Higit itong gumanda. Kaakit-akit. Minsan pa, dala nito ang karismang umaakit sa kanya. Mahabang panahon na ang lumipas. At kahit may poot sa kanyang dibdib sa babaing nagwasak ng kanyang puso, natuklasan ni Alex na hindi ito ganoon kadaling tanggihan. Gaya pa rin nang dati. Kayang paikutin ni Edna sa kanyang mga palad. Paano niya titimbangin ang kanyang damdamin gayung may nagmamay-ari na ng kanyang puso na hindi naman iba sa babaing nagdulot sa kanya ng pait, mula pa noon hanggang ngayon.